پاکستانی اوپنر بلے باز صائم ایوب کا جنوبی افریقہ سے پہلے ٹی ٹوئنٹی میچ میں شکست کے بعد کہنا تھا کہ ہمارے بیٹرز جنوبی افریقہ کی بولنگ کا اچھا مقابلہ نہیں کرسکے، اسٹیڈیم میں اوس زیادہ ہوتی ہے جس کی وجہ سے پہلے فیلڈنگ کی۔
پاکستانی اوپنر بلے باز صائم ایوب نے راولپنڈی میں پریس کانفرنس کرتے ہوئے کہا کہ جنوبی افریقہ نے کنڈیشنز کے مطابق بولنگ کی۔ بیٹنگ اچھی نہیں ہو رہی، مگر کوشش کررہے ہیں۔
انہوں نے کہا کہ ٹیم کے آل آؤٹ پر نہیں بلکہ مجموعی کارکردگی پر توجہ دینی چاہیے، گزشتہ سیریز کے مقابلے میں زیادہ رنز بن رہے ہیں۔ گزشتہ سیریز کے مقابلے میں زیادہ رنز بن رہے ہیں۔
جبکہ پاکستان ٹی ٹوئنٹی ٹیم کے کپتان سلمان علی آغا نے اعتراف کیا ہے کہ بولنگ اچھی رہی نہ بیٹنگ، ہمیں کھیل کے تمام شعبوں میں بہتری لانا ہوگی۔
میچ میں شکست کے بعد پریس کانفرنس کرتے ہوئے سلمان علی آغا کا کہنا تھا کہ بولنگ میں شروعات اچھی نہیں کرسکے، بیٹنگ میں لگا تار وکٹیں گنوانے کی وجہ سے مشکل ہو رہی ہے۔
انہوں نے کہا کہ بیٹنگ کے دوران اچھی شراکت داری نہیں بنا پارہے، اپنی غلطیوں پربات ضرور کی جاتی ہے کیونکہ ان غلطیوں کو دہرانا نہیں چاہتے۔
ایک سوال کے جواب میں انہوں نے کہا کہ اپنی غلطیوں سے سیکھ کر ہی ٹی ٹوئنٹی ورلڈکپ کی تیاری کریں گے، ٹی ٹوئنٹی ورلڈ کپ تک ہماری حمکت عملی ایسی ہی رہے گی۔
جنوبی افریقا نے پہلے ٹی 20 میں پاکستان کو شکست دے دی
ان کا مزید کہنا تھا کہ جس میدان میں بھی کھیلتے ہیں اُس کے اعداد وشمار دیکھتے ہیں، اور گراؤنڈ کے اوسط اسکور سے زیادہ رنز کرنے کی کوشش کرتے ہیں۔
سلمان علی آغا نے بتایا کہ میری انفرادی پرفارمنس حالیہ دو تین سیریز سے اچھی نہیں رہی، میری کوشش ٹیم کو جتوانے کی ہوگی، میری پہلی ترجیح بیٹنگ کی طرف ہوتی ہے، اگر ٹی ٹوئنٹی میں ضرورت پڑی تو بولنگ بھی کروں گا۔
