اسلام آباد: ترجمان اوگرا عمران غزنوی نے کہا ہے کہ غیرمعیاری گیس سلینڈرز اور غیرقانونی گیس فلنگ کے خاتمے میں سب سے بڑی رکاوٹ کمزور اور معمولی سزائیں ہیں۔ انہوں نے کہا کہ اگر اوگرا کی تجویز کردہ سخت سزاؤں کو قانون کا حصہ بنا لیا جائے تو اس غیرقانونی کاروبار کی مؤثر روک تھام ممکن ہو سکتی ہے۔
ترجمان کے مطابق غیرمعیاری سلینڈرز اور غیرقانونی فلنگ کے خلاف کارروائی اوگرا نہیں بلکہ ضلعی انتظامیہ کی ذمہ داری ہے۔ انہوں نے کہا کہ فیکٹریوں پر چھاپوں کے بعد معمولی جرمانے کی ادائیگی کے ذریعے کام دوبارہ شروع کر دیا جاتا ہے جبکہ سڑکوں اور چوراہوں پر ری فیلنگ نہ صرف غیرقانونی ہے بلکہ ’’موت کا کھیل‘‘ بھی قرار دی جا سکتی ہے۔
عمران غزنوی کے مطابق بھاری جرمانوں سے متعلق قانون سازی حتمی مراحل میں ہے جبکہ معیاری سلینڈرز تیار کرنے والی کمپنیوں کی فہرست اوگرا کی ویب سائٹ پر موجود ہے۔ ترجمان نے مزید کہا کہ اوگرا ایک ٹیکنیکل اتھارٹی ہے اور صوبائی و ضلعی اداروں کی جانب سے تحقیقات کی صورت میں معلومات شیئر کرتی ہے۔
