فلم ’عبیر گلال‘ دنیا بھر میں ریلیز؛ بھارت میں کب سینما گھروں کی زینت بنے گی؟

انڈین میڈیا کے مطابق فواد خان اور وانی کپور کی فلم ’عبیر گلال‘ کی ریلیز پہلگام فالس فلیگ آپریشن کے بعد پاکستان اور بھارت کے درمیان کشیدگی کی وجہ سے التوا کا شکار رہی۔
عبیر گلال کو آج بھارت کے علاوہ دنیا بھر میں ریلیز کیا گیا تاہم اب خبریں سامنے آ رہی ہیں کہ اسے انڈیا کے سینما گھروں میں بھی نمائش کیلیے پیش کیا جائے گا جس کیلیے 26 ستمبر 2025 کی تاریخ طے کی گئی ہے۔
دونوں ممالک کے درمیان کشیدگی کی وجہ سے نہ صرف یہ فلم متاثر ہوئی بلکہ بھارتی گلوکارہ دلجیت دوسانجھ اور پاکستانی اداکارہ ہانیہ عامر کی فلم ’سردار جی 3‘ کو بھی ریلیز میں مشکلات کا سامنا رہا۔
بالی وڈ ہنگامہ کی ایک رپورٹ کے مطابق انڈین اسٹوریز لمیٹڈ (یو کے) کی ٹیم نے فیصلہ کیا ہے کہ ’عبیر گلال‘ کو دو ہفتوں بعد یعنی 26 ستمبر کو بھارتی سینما گھروں میں ریلیز کیا جائے گا۔
رپورٹ میں مزید بتایا گیا کہ وہ فلم کے حوالے سے پُراعتماد ہیں اور سمجھتے ہیں کہ یہ سادہ اور دلکش رومانوی کہانی ہر جگہ بشمول بھارت ناظرین کو اپنی طرف کھینچ سکتی ہے، مزید برآں 26 ستمبر کو کوئی اور فلم ریلیز کے لیے شیڈول نہیں اس لیے اس کو ملک میں سولو ریلیز کا فائدہ ملے گا۔
فواد خان اور وانی کپور کی فلم ایک رومانٹک کامیڈی ہے جو غیر متوقع روابط، دوسرے مواقع اور محبت کیلیے جگہ بنانے کے بارے میں ہے۔ یہ دو زخمی دلوں کو ایک دوسرے سے جوڑتی ہے اور وہ آہستہ آہستہ ایک گہرا رابطہ قائم کرتے ہیں جو محبت میں بدل جاتا ہے