ایشیا کپ 2025 کے سپر فور مرحلے میں روایتی حریفوں کے درمیان پاک بھارت ٹاکرا کھیلا جا رہا ہے۔ گزشتہ میچ میں بھارتی کھلاڑیوں کا پاکستانی کرکٹرز سے ہاتھ نہ ملانا بڑا تنازع بنا اور اب پاکستانی اوپنر فخر زمان کا آؤٹ متنازع بن گیا ہے۔
آج کے میچ میں بھارت نے ٹاس جیت کر پہلے فیلڈنگ کا فیصلہ کیا اور پاکستان کی جانب سے صاحبزادہ فرحان اور فخر زمان نے اننگ کا آغاز کیا۔
چیمپئنز ٹرافی 2017 کے ہیرو فخر زمان نے جارحانہ انداز اختیار کرتے ہوئے 8 گیندوں پر تین چوکوں کی مدد سے 15 رنز اسکور کر چکے تھے۔ اس موقع پر پانڈیا کی ایک گیند فخر زمان کے بلے کا کنارا چھوتے ہوئے وکٹ کیپر سنجو سمپسن کے پاس گئی۔ تاہم کیچ مشکوک ہونے کے باعث کاٹ بی ہائینڈ کا فیصلہ تھرڈ امپائر کے پاس گیا۔ ری پلے میں کئی بار اس کو دیکھا گیا۔
زوم ری پلے میں گیند واضح طور پر وکٹ کیپر کے گلوز میں جانے سے پہلے زمین سے ٹکراتی ہوئی دکھائی دی۔ تاہم تھرڈ امپائر نے فخر زمان کو آؤٹ قرار دے دیا۔
فخر زمان بھی تھرڈ امپائر کے فیصلے پر حیرانی کا اظہار کیا جب کہ پاکستان کے سابق فاسٹ بولر محمد عامر نے بھی ٹویٹ کر کے واضح طور پر لکھا کہ ’’فخر زمان آؤٹ نہیں تھے۔‘‘
سابق ٹیسٹ کرکٹر فواد عالم نے بھی ٹویٹ کرتے ہوئے لکھا کہ فخر زمان واضح طور پر ناٹ آؤٹ تھے۔ انہوں نے طنزیہ انداز میں لکھا کہ ایسا لگتا ہے کہ آج ہم 11 نہیں بلکہ 14 کھلاڑیوں کے خلاف کھیل رہے ہیں۔
دوسری جانب سوشل میڈیا پر بھی صارفین نے اس فیصلے پر حیرانی کا اظہار کرتے ہوئے پاکستان کے جارح مزاج اوپنر کا آؤٹ متنازع قرار دے دیا اور لکھا کہ ری پلے میں واضح تھا کہ فخر زمان آؤٹ نہیں، لیکن پھر بھی انہیں غلط آؤٹ دیا گیا
