سینئر اداکارہ نادیہ افگن نے درختوں کی کٹائی پر پنجاب حکومت پر شدید برہمی کا اظہار کیا ہے۔
اداکارہ نے سوشل میڈیا پر جاری کی گئی ایک ویڈیو میں پنجاب حکومت کو تنقید کا نشانہ بناتے ہوئے کہا کہ وہ حکومت کے طرزِ عمل کو سمجھنے سے قاصر ہیں۔ ان کا کہنا تھا کہ ’’ایک دن میں پنجاب حکومت کی تعریف کرتی ہوں اور اگلے ہی دن وہ اپنے ہی اقدامات سے سب کچھ ضائع کر دیتی ہے۔‘‘
نادیہ افگن نے کہا کہ پنجاب حکومت مسلسل درخت کاٹ رہی ہے، حالانکہ عدالت کی جانب سے درختوں کی کٹائی پر پابندی عائد کی جا چکی ہے۔ ان کے مطابق اسموگ کی سنگین صورتحال کے باوجود درخت لگانے کے بجائے کاٹے جا رہے ہیں، جو انتہائی تشویشناک عمل ہے۔
انہوں نے دعویٰ کیا کہ لاہور میں 150 سال پرانا درخت بھی کاٹ دیا گیا ہے۔ اداکارہ کا کہنا تھا کہ حکومت پہلے خود احکامات جاری کرتی ہے اور پھر انہی پر عملدرآمد نہیں کرتی۔ انہوں نے حکومت سے اپیل کی کہ درختوں کی کٹائی فوری طور پر روکی جائے۔
اس کے علاوہ نادیہ افگن نے کتوں کو مارنے کے معاملے پر بھی پنجاب حکومت کو تنقید کا نشانہ بنایا۔ انہوں نے کہا کہ لاہور ہائیکورٹ نے کتوں کو مارنے پر پابندی عائد کر رکھی ہے، اس کے باوجود پنجاب حکومت کی جانب سے یہ عمل جاری ہے۔ اداکارہ کے مطابق سوشل میڈیا پر ایسی پوسٹس بھی سامنے آئی ہیں جن میں دعویٰ کیا گیا ہے کہ کتوں کو مارنے کے لیے زہر اور اسلحہ فراہم کیا گیا ہے۔
نادیہ افگن نے حکومت سے مطالبہ کیا کہ وہ عدالتی احکامات کا احترام کرے اور ماحول و جانوروں کے تحفظ کو یقینی بنائے۔
