سی ٹی ڈی اور پولیس کی صوابی میں کارروائی، 2 انتہائی مطلوب دہشتگرد ہلاک

پشاور: سی ٹی ڈی، پولیس نے صوابی میں کارروائی کرتے ہوئے 2انتہائی مطلوب دہشتگردوں کو ہلاک کردیا، دونوں قتل ویگر مقدمات میں مطلوب تھے۔
ترجمان سی ٹی ڈی نے بتایا کہ ہلاک دہشتگردوں سے اسلحہ اور ایمونیشن بھی برآمد ہوا ہے، موٹرسائیکل سوار دہشتگردوں نے سی ٹی ڈی اور پولیس اہلکاروں پرفائرنگ کی۔
پولیس اور سی ٹی ڈی کی جوابی فائرنگ میں 2 دہشتگرد ہلاک ہوئے، دہشتگردوں کی شناخت نعمان عرف مانے اور عبد الباسط تلاوت شاہ کے نام سے ہوئی۔
ترجمان سی ٹی ڈی نے مزید بتایا کہ دہشتگرد پولیس اہلکاروں کے قتل سمیت دیگر مقدمات میں مطلوب تھے، 2 دہشت گردوں کی تلاش کیلئے سرچ آپریشن جاری ہے۔
دریں اثنا افغان طالبان اور فتنہ الخوارج کا گٹھ جوڑ بے نقاب ہو گیا ہے گرفتار کم عمر خودکش بمبار نے ہوش ربا انکشافات کیے ہیں۔
افغان طالبان اور فتنہ الخوارج کم عمر افغان نوجوانوں کو دہشتگردی کے لیے استعمال کر رہے ہیں، گرفتار خودکش بمبار نعمت اللہ قندھار جوہریہ مدرسے میں حفظ قرآن کا طالبعلم ہے۔
اس نے بتایا کہ وہ افغان صوبے قندھار کا رہائشی ہے، مدرسے میں موجود کچھ لوگوں نے مجھے کہا کہ پاکستانی فوج کیخلاف جہاد جائز ہے۔
دہشتگردی کے حوالے سے ہوشربا انکشافات کرنے والا خودکش بمبار نعمت اللہ کو جنوبی وزیرستان میں ایف سی ساؤتھ نے بڑی کارروائی کرتے ہوئے گرفتار کیا تھا۔