ٹماٹر کی قیمت میں ہوشربا اضافہ، مرغی کو بھی پیچھے چھوڑ دیا

کراچی : ملک میں ٹماٹر کی قیمت 500 کا ہندسہ عبور کر گئی جبکہ پیاز، آلو، ہری مرچ، بھنڈی، توری، ادرک لہسن کی قیمتیں بھی آسمان کو چھو رہی ہیں۔
تفصیلات کے مطابق ملک میں مہنگائی کے طوفان نے مزید شدت اختیار کرلی، روزمرہ استعمال کی تقریباً تمام اشیاء ہی اس وقت مہنگائی کے طوفان کی لپیٹ میں آچکی ہیں۔
اسی صورتحال میں سبزیوں کی قیمتوں میں بھی ہوشربا اضافہ دیکھا جارہا ہے اور ٹماٹر کی فی کلو قیمت نے مرغی کو بھی پیچھے چھوڑ دیا، سرخ ٹماٹر کی قیمت نے شہریوں کو لال پیلا کردیا ہے۔
ملک میں ٹماٹر کے نرخ نے 500 کا ہندسہ عبور کرلیا، بدین میں 450 روپے فی کلو تک پہنچ گیا جبکہ جام شورو، میر پور خاص اور تربت میں بھی فی کلو ٹماٹر 450 روپے میں فروخت ہورہا ہے۔
کراچی میں بھی اس کی قیمت میں اچانک بڑا اضافہ ہوا اور فی کلو قیمت چار روپے سے بھی تجاوز کرگئی۔
کراچی میں ٹماٹر 450 سے 550 روپے فی کلو تک فروخت ہورہا ہے جبکہ مرغی کا گوشت 450روپے سے 500 روپے فی کلو میں دستیاب ہے۔ سبزی فروشوں کے مطابق پنجاب سے ٹماٹر کی سپلائی محدود ہے اور مارکیٹ میں سندھ کی فصل آنے کا انتظار ہے۔
ان کا کہنا ہے کہ اس وقت کراچی کی 90 فیصد طلب ایرانی ٹماٹر سے پوری کی جا رہی ہے جبکہ افغانستان سے درآمد بند ہونے کے باعث قیمت میں مزید اضافہ ہوگیا ہے۔
علاوہ ازیں ٹماٹر کے ساتھ ساتھ،، پیاز، آلو، ہری مرچ، بھنڈی، توری، ادرک لہسن کی قیمتیں بھی آسمان کو چھو رہی ہیں۔