کرپشن اسکینڈل : کلرک کے گھر سے پینٹ کے ڈبوں میں چھپائے 20 کروڑ برآمد

پشاور : کوہستان کرپشن اسکینڈل میں کلرک کے گھر سے پینٹ کے ڈبوں میں چھپائے 20 کروڑ برآمد کرلئے گئے ، قیصر اقبال اور ان کی اہلیہ پر 34 ارب روپے کے غبن کا الزام ہے۔
تفصیلات کے مطابق قومی احتساب بیورو (نیب) پشاور نے کوہستان مالیاتی اسکینڈل کے مرکزی ملزم قیصر اقبال کے گھر پر چھاپہ مار کر 20 کروڑ روپے نقدی برآمد کرلی۔
ذرائع نے بتایا کہ کارروائی ملزم کی گرفتار اہلیہ کی نشاندہی پر کی گئی، برآمد ہونے والی رقم پینٹ کے ڈبوں میں چھپائی گئی تھی۔
نیب ذرائع کا کہنا تھا کہ قیصر اقبال اور ان کی اہلیہ پر 34 ارب روپے کے غبن کا الزام ہے، جب کہ ادارہ اب تک 14 ارب روپے کی رقم پہلے ہی برآمد کر چکا ہے۔
دونوں میاں بیوی کو ایبٹ آباد سے گرفتار کیا گیا تھا، اور احتساب عدالت نے گزشتہ روز انہیں تین روزہ جسمانی ریمانڈ پر نیب کے حوالے کردیا جبکہ اسکینڈل میں 20 سے زائد ملزمان گرفتار ہوچکے ہیں۔
مرکزی ملزم قیصر اقبال سی اینڈ ڈبلیو (کمیونیکیشن اینڈ ورکس) ڈیپارٹمنٹ اپر کوہستان میں 2013 سے بطور کلرک تعینات رہا اور بعد ازاں ہیڈ کلرک کے عہدے پر ترقی پائی، تحقیقات جاری ہیں اور مزید انکشافات متوقع ہیں۔