لاہور: پنجاب کے وزیرِ تعلیم رانا سکندر حیات نے خود تدریسی عمل کا حصہ بننے کا اعلان کر دیا ہے۔
رانا سکندر حیات کے مطابق وہ ستمبر کے پہلے ہفتے سے لاہور کے مختلف سرکاری اسکولوں میں طلبہ کو پڑھائیں گے۔ انہوں نے بتایا کہ وہ ابتدا انگلش اور کیمسٹری کے مضامین سے کریں گے، کیونکہ یہ دونوں ان کے پسندیدہ مضامین ہیں۔
وزیرِ تعلیم نے کہا کہ وہ پرائمری سطح پر انگلش جبکہ ہائی اسکول کی سطح پر کیمسٹری پڑھائیں گے، تاہم مستقبل میں دیگر مضامین بھی خود پڑھانے کا ارادہ رکھتے ہیں۔
انہوں نے مزید بتایا کہ ہر ہفتے بغیر کسی پیشگی اطلاع کے کسی ایک سرکاری اسکول کا دورہ کریں گے اور تدریسی عمل میں حصہ لیں گے۔ ان کا کہنا تھا کہ وہ اساتذہ کے پیشے کا بے حد احترام کرتے ہیں اور استاد کا کردار ادا کرنا اپنے لیے باعثِ فخر سمجھتے ہیں۔
رانا سکندر حیات کے مطابق اس اقدام کا مقصد تعلیمی معیار کا عملی جائزہ لینا، تدریسی نظام کو بہتر بنانا اور اسکولوں میں موجود کمزوریوں کی نشاندہی کرکے انہیں دور کرنا ہے۔
