اسلام آباد: پاکستان میں پولیو وائرس کے ماحولیاتی نمونوں میں مثبت کیسز کی شرح میں نمایاں کمی ریکارڈ کی گئی ہے۔
نیشنل ایمرجنسی آپریشنز سینٹر کے مطابق جون 2026 کے دوران ملک بھر سے 127 ماحولیاتی نمونے جمع کیے گئے، جن میں سے 117 میں پولیو وائرس موجود نہیں پایا گیا، جبکہ صرف 10 نمونوں میں وائرس کی تصدیق ہوئی۔
ای او سی کے اعداد و شمار کے مطابق جنوری سے جون 2026 کے دوران پولیو وائرس کے مثبت ماحولیاتی نمونوں کی تعداد 369 سے کم ہو کر 100 رہ گئی ہے، جو انسدادِ پولیو اقدامات کی بہتری کی نشاندہی کرتی ہے۔
صوبہ پنجاب سے حاصل کیے گئے تمام 31 ماحولیاتی نمونے پولیو وائرس سے پاک قرار دیے گئے، جبکہ سندھ کے 29 میں سے 28، خیبرپختونخوا کے 34 میں سے 30 اور بلوچستان کے 23 میں سے 18 نمونوں میں بھی پولیو وائرس نہیں پایا گیا۔
نیشنل ای او سی کے مطابق رواں سال اب تک ملک میں پولیو کے صرف 3 کیسز کی تصدیق ہوئی ہے، جبکہ سال کے پہلے چھ ماہ میں مثبت ماحولیاتی نمونوں کی شرح 48.1 فیصد سے کم ہو کر 13.1 فیصد تک آ گئی ہے۔
ادارے کا کہنا ہے کہ پولیو کے مکمل خاتمے کے لیے ماحولیاتی نگرانی، ویکسینیشن کوریج اور بچوں تک رسائی کے نظام کو مزید مؤثر بنایا جا رہا ہے۔ والدین سے اپیل کی گئی ہے کہ وہ پانچ سال سے کم عمر ہر بچے کو انسدادِ پولیو مہم کے دوران پولیو کے قطرے ضرور پلوائیں۔
