لاہور ڈویلپمنٹ اتھارٹی نے مون سون سیزن کے پیش نظر شہر بھر کی تعمیراتی سائٹس پر سخت حفاظتی اقدامات نافذ کرتے ہوئے 15 اگست تک کھدائی کے تمام کاموں پر پابندی عائد کر دی ہے۔
ایل ڈی اے کے مطابق پابندی کی خلاف ورزی کرنے والوں کے خلاف ایف آئی آر درج کرنے، پراپرٹی سیل کرنے، بلڈنگ پلان منسوخ کرنے اور بھاری جرمانے عائد کرنے سمیت سخت قانونی کارروائی کی جائے گی۔ متعلقہ قوانین پر مکمل عملدرآمد یقینی بنانے کی بھی ہدایت جاری کی گئی ہے۔
اتھارٹی نے تمام تعمیراتی منصوبوں پر شورنگ اور ریٹیننگ وال کے مناسب انتظامات، جبکہ تہہ خانوں سمیت ہر تعمیراتی مقام پر سٹرکچرل استحکام اور حفاظتی اقدامات کو لازمی قرار دیا ہے۔
مزید برآں تمام آرکیٹیکٹس، سٹرکچرل انجینئرز اور ریذیڈنٹ انجینئرز کو تین روز کے اندر حفاظتی سرٹیفکیٹ جمع کرانے کا حکم دیا گیا ہے۔
سیکرٹری ہاؤسنگ نور الامین مینگل نے کہا ہے کہ ہمسایہ املاک، عوامی انفراسٹرکچر اور انسانی جانوں کے تحفظ پر کوئی سمجھوتہ نہیں کیا جائے گا۔ ان کا کہنا تھا کہ ناکافی حفاظتی انتظامات کے باعث کسی بھی جانی یا مالی نقصان کی صورت میں مالک، بلڈر اور متعلقہ انجینئر ذمہ دار ہوں گے۔
