کراچی : کراچی میں آل پرائیویٹ اسکولز مینجمنٹ ایسوسی ایشن سندھ کے چیئرمین سید طارق شاہ نے ہفتے کے روز اسکول کھولنے کا اعلان کردیا تاکہ موسم کے باعث چھٹیوں سے ہونے والے تعلیمی نقصان کو کم کیا جا سکے۔”
تفصیلات کے مطابق کراچی میں آل پرائیویٹ اسکولز مینجمنٹ ایسوسی ایشن سندھ کے چیئرمین سید طارق شاہ نے کہا کہ شدید بارشوں اور شہری سیلاب کے باعث طویل تعطیلات کے بعد آج سے کراچی کے نجی تعلیمی ادارے دوبارہ کھل گئے ہیں۔
چیئرمین نے کہا کہ ضائع ہو نیوالے تعلیمی دنوں کی تلافی کیلئے ہفتے کے روز کو تدریسی عمل جاری رہے گا، تاکہ بار بار موسم کے باعث چھٹیوں سے ہونے والے تعلیمی نقصان کو کم کیا جا سکے۔”
یہ فیصلہ رواں برس بار بار بارشوں اور موسمی ہنگامی صورتحال کے دوران طلبہ کو ہونے والے تعلیمی نقصان کو کم سے کم کرنے کے لیے کیا گیا ہے۔
واضح رہے کہ گزشتہ دو روز سے کراچی میں مسلسل بارشوں نے نظام زندگی کو بری طرح متاثر کیا، شہر کے نشیبی علاقے زیر آب آ گئے جبکہ ملیر اور لیاری ندیوں میں پانی کی سطح میں بھی اضافہ ہوا۔
وقفے وقفے سے جاری ہلکی اور تیز بارشوں کے باعث اہم سڑکیں اور گلیاں زیر آب آگئیں اور روزمرہ معمولات شدید متاثر ہوئے۔
یاد رہے کہ سندھ حکومت نے منگل کو پاکستان موسمیاتی محکمہ کی پیش گوئی کے بعد کراچی ڈویژن کے تمام سرکاری و نجی اسکولوں، کالجوں اور تعلیمی اداروں کو بند رکھنے کا اعلان کیا تھا، محکمہ موسمیات نے شہر میں مزید بارشوں، تیز ہواؤں اور گرج چمک کے امکانات ظاہر کیے تھے۔
چیئرمین سید طارق شاہ نے ہفتے کے روز اسکول کھولنے کا اعلان کردیا
