برطانوی ایئرلائن نے بڑا اعلان کردیا

اسلام آباد : پاکستان سے برطانیہ جانے والے مسافروں کے لئے بڑی خوشخبری آگئی ، برطانوی ایئرلائن نے بڑا اعلان کردیا۔
تفصیلات کے مطابق برطانیہ کی ورجن اٹلانٹک ایئرلائن نے پاکستان کے لیے فضائی آپریشن دوبارہ شروع کرنے کا اعلان کر دیا۔
ذرائع نے بتایا کہ پاکستان سول ایوی ایشن اتھارٹی (سی اے اے) نے ایئرلائن کو پروازوں کی اجازت دے دی ہے۔
ورجن اٹلانٹک اکتوبر سے لندن سے کراچی، اسلام آباد اور لاہور کے لیے فلائٹس بحال کرے گی، ایئرلائن اپنے فضائی آپریشن کو سعودی عرب کے شہر ریاض کے ذریعے پاکستان سے منسلک کرے گی۔
یاد رہے کہ ورجن اٹلانٹک نے 2023 میں پاکستان کے لیے اپنی پروازیں بند کر دی تھیں، تاہم سول ایوی ایشن اتھارٹی (سی اے اے) نے ایک بار پھر آپریشن کی اجازت دے دی۔
برطانوی ایئرلائن کے فضائی آپریشن کی بحالی کے اعلان سے برطانیہ اور پاکستان کے درمیان سفری سہولیات میں بہتری آئے گی۔
یاد رہے کہ ایئرلائن نے گزشتہ برس لندن ہیئتھرو سے لاہور اور اسلام آباد کے لیے پروازیں بند کرنے کا فیصلہ اپنے نیٹ ورک ریویو کے دوران کیا تھا۔