روس کے مشرقی علاقے کامچٹکا جزیرہ نما میں شدید زلزلہ آیا ہے، جس کی شدت ریکٹر اسکیل پر 7.8 ریکارڈ کی گئی۔
بین الاقوامی خبر رساں ادارے کی رپورٹ کے مطابق امریکی جیولوجیکل سروے کا کہنا ہے کہ ریکٹر سکیل پر زلزلے کی شدت 7.8 تھی اور اس کا مرکز سطح سے تقریباً 10 کلومیٹر نیچے تھا۔
روس میں کامچٹکا کے علاقے کے گورنر ولادیمیر سولودوف نے اعلان کیا ہے کہ مشرقی ساحل کے لیے سونامی کی وارننگ جاری کر دی گئی ہے۔
اُن کا کہنا تھا کہ مقامی افراد کو اس حوالے سے الرٹ کردیا گیا ہے، تاہم ابھی تک کسی نقصان کی اطلاع سامنے نہیں آئی۔
امریکی سونامی وارننگ سسٹم کا کہنا ہے کہ اس زلزلے کے بعد کسی بڑے سونامی کا فی الحال کوئی خطرہ نہیں ہے۔
واضح رہے کہ روس کا یہ علاقہ دنیا کے سب سے زیادہ زلزلہ زدہ علاقوں میں سے ایک ہے، جہاں بحرالکاہل پلیٹ اور شمالی امریکی پلیٹ آپس میں ملتی ہیں۔ یہی وجہ ہے کہ یہاں زلزلے عام ہیں۔
اس سے قبل 29 جولائی 2025 کو کامچٹکا کے ساحل پر 8.8 شدت کا زلزلہ آیا تھا۔ اسے پچھلی دہائی کے سب سے بڑے زلزلوں میں سے ایک قرار دیا گیا تھا۔
الاسکا، گوام، روس، جاپان، ہوائی اور بحر الکاہل کے دیگر جزائر کے لیے سونامی کی وارننگ جاری کردی گئی تھی۔
