بلوچستان: جوڈیشل کمپلیکس پر مسلح افراد کا حملہ، قاضی لاپتہ، عمارت کو آگ لگا دی

بلوچستان کے ضلع خاران میں نامعلوم مسلح افراد نے جوڈیشل کمپلیکس پر حملہ کردیا اور عمارت کو آگ لگا دی گئی۔
پولیس کے مطابق بلوچستان کے ضلع خاران میں جوڈیشل کمپلیکس پر مسلح افراد نے حملہ کردیا اور جوڈیشل کمپلیکس کے ریکارڈ کو آگ لگا دی، اس واقعے کے بعد قانون نافذ کرنیوالے اداروں کی نفری پہنچ گئی۔
پولیس کا کہنا ہے کہ فائرنگ کا تبادلہ جاری ہے، حملہ آوروں نے توڑ پھوڑ کے بعد عمارت میں بھی آگ لگا دی جبکہ حملے کے دوران قاضی کورٹ کو بھی نقصان  پہنچا ہے اور ذرائع کا کہنا ہے کہ قاضی لاپتہ ہے۔
واقعے کے بعد سیکیورٹی فورسز اورپولیس نے علاقے کوگھیرے میں لے کر سرچ آپریشن شروع کر دیا ہے۔پولیس اور ریسکیو اہلکاروں نے موقع پر پہنچ کر آگ بجھانے کا عمل شروع کیا اور کئی گھنٹوں کی جدوجہد کے بعد آگ بجھا دی