کرکٹر کھیل سے ریکارڈ بناتے ہیں مگر آصف آفریدی نے ڈیبیو کرتے ہی ایک منفرد عالمی ریکارڈ اپنے نام کر لیا۔
پاکستان اور جنوبی افریقہ کے درمیان دو ٹیسٹ میچوں پر مشتمل سیریز کا دوسرا اور آخری ٹیسٹ آج سے شروع ہوا۔ اس میچ میں پاکستان نے آصف آفریدی کو ڈیبیو کرایا اور انہیں ٹیسٹ کیپ پیش کی۔
آصف آفریدی جو پشاور میں پیدا ہوئے ایک بولنگ آل راؤنڈر ہیں، جو بائیں ہاتھ سے فنگر اسپن بولنگ کرتے ہیں اور لیفٹ ہینڈ بلے باز ہیں۔
انہوں نے جب آج پنڈی میں بطور ٹیسٹ کرکٹر میدان میں قدم رکھا تو ان کی عمر 38 سال اور 299 دن تھی۔ اس طرح 21 ویں صدی میں ٹیسٹ ڈیبیو کرنے والے دنیا کے سب سے زیادہ عمر رسیدہ کھلاڑی بن گئے ہیں۔
اس کے علاوہ وہ پاکستان کی جانب سے ٹیسٹ کرکٹ میں بڑی عمر میں ڈیبیو کرنے والوں کی فہرست میں بھی شامل ہو گئے ہیں اور دوسری پوزیشن حاصل کر لی ہے۔
اس فہرست میں ان سے آگے صرف میران بخش کا نام آتا ہے، جنہوں نے 1955 میں بھارت کے خلاف لاہور ٹیسٹ میں ڈیبیو کیا تھا تو ان کی عمر 47 برس اور 284 دن تھی۔
ان کے علاوہ تابش خان نے 36 سال 146 دن، ذوالفقار بابر نے 34 سال 308 دن اور زاہد محمود نے 34 سال 256 دن میں ڈیبیو کیا تھا اور وہ بالترتیب اس فہرست میں تیسری، چوتھی اور پانچویں پوزیشن پر ہیں۔
آصف آفریدی نے 2009 میں فرسٹ کلاس کرکٹ سے کھیل کا آغاز کیا لیکن صرف تین میچز کھیلنے کے بعد وہ 6 سال تک میدانوں سے غائب رہے۔
انہوں نے فرسٹ کلاس کرکٹ میں قدم 2009 میں رکھا تھا۔ آل راؤنڈر اب تک 57 فرسٹ کلاس میچز میں 25.49 کی اوسط کے ساتھ 198 وکٹیں حاصل کر چکے ہیں۔
ٹیسٹ کرکٹ کی تاریخ میں انگلینڈ کے جیمز ساؤتھرٹن 49 سال اور 119 دن کی عمر میں 1877 میں آسٹریلیا کے خلاف ڈیبیو کیا تھا۔ یہ ریکارڈ 148 سال میں کوئی بھی نہیں توڑ سکا ہے
