کراچی میں کے الیکٹرک میں چیئرمین اور سی ای او کی تبدیلی کے بعد ادارے میں بڑے پیمانے پر انتظامی ردوبدل کا سلسلہ جاری ہے، جس کے تحت کئی اہم عہدوں پر نئی تقرریاں کی گئی ہیں۔
ذرائع کے مطابق نئے سی ای او سید محمد طحہ نے اپنی نئی ٹیم تشکیل دینے کیلئے پرانے افسران کی جگہ نئی تقرریاں شروع کر دی ہیں۔ طویل عرصے سے قائم مقام چیف ڈسٹری بیوشن آفیسر کے طور پر خدمات انجام دینے والی سعدیہ دادا کو عہدے سے ہٹا دیا گیا ہے۔
ان کی جگہ علی کمال کو مستقل طور پر نیا چیف ڈسٹری بیوشن آفیسر مقرر کیا گیا ہے، جبکہ بجلی کی پیداوار کے شعبے میں عمران احمد کو چیف جنریشن آفیسر تعینات کیا گیا ہے۔
ذرائع کا کہنا ہے کہ ان تبدیلیوں کا مقصد ادارے کی کارکردگی بہتر بنانا اور کراچی میں بجلی کی تقسیم و پیداوار کے نظام کو جدید خطوط پر استوار کرنا ہے۔
چیئرمین اور سی ای او کی سطح پر تبدیلی کے بعد نچلی سطح پر بھی مزید انتظامی ردوبدل کی توقع کی جا رہی ہے تاکہ نئے وژن کے مطابق اہداف حاصل کیے جا سکیں۔
صارفین اور ماہرین ان تبدیلیوں کو کراچی میں بجلی کی صورتحال میں ممکنہ بہتری کے تناظر میں دیکھ رہے ہیں۔
