وفاقی حکومت نے پیٹرولیم مصنوعات کی قیمتوں میں ردوبدل کرتے ہوئے ہوائی جہازوں میں استعمال ہونے والے ایندھن (جیٹ فیول) اور لائٹ ڈیزل آئل کی قیمتوں میں نمایاں کمی کا اعلان کر دیا ہے، جس سے ایوی ایشن، صنعتی اور زرعی شعبوں کو خاطر خواہ ریلیف ملنے کی توقع ہے۔
جاری کردہ نوٹیفکیشن کے مطابق جیٹ فیول کی قیمت میں 48 روپے 80 پیسے فی لیٹر کی بڑی کمی کی گئی ہے، جس کے بعد اس کی نئی قیمت 283 روپے 52 پیسے فی لیٹر مقرر کر دی گئی ہے۔ اس سے قبل جیٹ فیول 332 روپے 32 پیسے فی لیٹر میں فروخت ہو رہا تھا۔
ماہرین کا کہنا ہے کہ جیٹ فیول کی قیمت میں نمایاں کمی سے فضائی کمپنیوں کے آپریشنل اخراجات کم ہوں گے، جس کے نتیجے میں مستقبل میں فضائی کرایوں میں بھی کمی کا امکان پیدا ہو سکتا ہے۔
حکومت کے اس فیصلے کو ایوی ایشن انڈسٹری سمیت مختلف اقتصادی شعبوں کے لیے مثبت پیش رفت قرار دیا جا رہا ہے، جبکہ صنعتی اور زرعی سرگرمیوں پر بھی اس کے خوشگوار اثرات مرتب ہونے کی توقع ہے۔
