ملک کے مختلف علاقوں میں شدید گرمی کی لہر برقرار ہے جبکہ محکمہ موسمیات نے خبردار کیا ہے کہ سندھ اور پنجاب کے بیشتر میدانی علاقوں میں گرمی کی شدت اتوار تک برقرار رہ سکتی ہے۔
محکمہ موسمیات کے مطابق گزشتہ روز سندھ کے شہروں دادو اور جیکب آباد میں سب سے زیادہ درجہ حرارت 51 ڈگری سینٹی گریڈ ریکارڈ کیا گیا، جو رواں موسم گرما کے بلند ترین درجات میں شمار ہوتا ہے۔
اعداد و شمار کے مطابق سبی، تربت، شہید بینظیر آباد، لاڑکانہ اور موہن جو دڑو میں درجہ حرارت 50 ڈگری سینٹی گریڈ تک پہنچ گیا، جبکہ خیرپور اور سکرنڈ میں 49 ڈگری سینٹی گریڈ ریکارڈ کیا گیا۔
دوسری جانب ڈیرہ غازی خان میں درجہ حرارت 47 ڈگری سینٹی گریڈ، لاہور میں 44 ڈگری سینٹی گریڈ جبکہ وفاقی دارالحکومت اسلام آباد میں بھی پارہ 40 ڈگری سینٹی گریڈ سے تجاوز کر گیا۔
محکمہ موسمیات نے کراچی کے حوالے سے پیش گوئی کرتے ہوئے کہا ہے کہ شہر میں آج زیادہ سے زیادہ درجہ حرارت 38 ڈگری سینٹی گریڈ تک جا سکتا ہے، جبکہ سمندری ہواؤں کی رفتار میں کمی کے باعث گرمی کی شدت زیادہ محسوس کی جا سکتی ہے۔
ماہرین نے شہریوں کو ہدایت کی ہے کہ غیر ضروری طور پر دھوپ میں نکلنے سے گریز کریں، پانی کا زیادہ استعمال کریں اور ہیٹ اسٹروک سے بچاؤ کے لیے احتیاطی تدابیر اختیار کریں
