پاکستان کی تاریخ میں پہلی مرتبہ سروائیکل کینسر سے بچاؤ کے لیے قومی سطح پر ویکسینیشن مہم کا آغاز ہونے جا رہا ہے۔ اس حوالے سے پنجاب، سندھ، آزاد کشمیر اور وفاقی دارالحکومت اسلام آباد میں رجسٹریشن کا عمل جاری ہے۔
سرکاری معلومات کے مطابق ہیومن پیپیلوما وائرس سے بچاؤ کی یہ مہم 15 سے 27 ستمبر تک چلائی جائے گی۔ اس دوران صوبائی وزارتِ صحت، محکمہ تعلیم اور ضلعی انتظامیہ کے تعاون سے اسکولوں میں 9 سے 14 سال کی طالبات کی رجسٹریشن کی جا رہی ہے۔
مہم کے دوران والدین کو آگاہی فراہم کرنے کے لیے وائس میسجز بھیجے جائیں گے تاکہ وہ بچیوں کو ایچ پی وی ویکسین کی افادیت سے متعلق جان سکیں۔ ویکسین اسکولوں کے علاوہ فکسڈ سائٹس، کمیونٹی سینٹرز اور موبائل یونٹس کے ذریعے بھی دستیاب ہوگی۔
محکمہ صحت کی ٹیمیں طالبات کو ویکسین لگانے کے عمل کی نگرانی کریں گی۔ یہ ویکسین گلوبل الائنس فار ویکسین اینڈ امیونائزیشن کی جانب سے پاکستان کو بلا معاوضہ فراہم کی جا رہی ہے۔
