کراچی میں پاک بحریہ کی پاسنگ آؤٹ پریڈ سے خطاب کرتے ہوئے وزیراعظم شہباز شریف نے پاس ہونے والے کیڈٹس کو مبارکباد دی اور دوست ممالک سے آنے والے کیڈٹس کی موجودگی کو خوش آئند قرار دیا۔ انہوں نے کہا کہ معرکۂ حق میں پاک بحریہ کا کردار قابلِ تحسین رہا۔
وزیراعظم نے کہا کہ ایرانی صدر مسعود پزشکیان کا حالیہ دورہ پاکستان دونوں ممالک کے برادرانہ تعلقات کی عکاسی کرتا ہے اور یہ پاکستان کے اہم سفارتی کردار کا اعتراف بھی ہے۔
انہوں نے مزید کہا کہ ایران اور امریکا کے درمیان مفاہمت کی یادداشت پر دستخط پاکستان کے لیے باعثِ اعزاز ہیں، جبکہ اس عمل میں دوست ممالک کے تعاون کو بھی سراہا۔ وزیراعظم کے مطابق خطے میں تیزی سے تبدیلیاں آ رہی ہیں، جن کے دور رس اثرات مرتب ہوں گے۔
شہباز شریف نے کہا کہ پاکستان کو بیرونی سرپرستی میں ہونے والی دہشت گردی کا سامنا ہے، تاہم افواجِ پاکستان دہشت گردی کے مکمل خاتمے کے لیے پرعزم ہیں۔ انہوں نے یہ بھی کہا کہ پاکستان دنیا میں امن کے علمبردار کے طور پر جانا جاتا ہے اور کشمیر و فلسطین کے عوام کی حمایت جاری رکھے گا۔
