ایشین گیمز کے ٹی20 کرکٹ مقابلے میں بڑا اپ سیٹ سامنے آیا، جہاں نیپال نے افغانستان کو 5 وکٹوں سے شکست دے کر گروپ مرحلے میں اہم کامیابی حاصل کرلی۔
نیسِن کے کوروگی اسپورٹس پارک میں کھیلے گئے میچ میں افغانستان نے ٹاس جیت کر پہلے بیٹنگ کا فیصلہ کیا، تاہم نیپالی بولرز کے سامنے افغان بیٹنگ لائن اپ مشکلات کا شکار رہی۔ افغانستان نے مقررہ 20 اوورز میں 7 وکٹوں کے نقصان پر 102 رنز بنائے۔
افغانستان کی جانب سے فیصل خان احمدزئی اور نجیب اللہ زدران نے 30،30 رنز بنا کر ٹیم کو سنبھالنے کی کوشش کی، جبکہ ننگیالیہ خان 17 رنز کے ساتھ ناٹ آؤٹ رہے۔ نیپال کی جانب سے کشال بھورتل نے 4 جبکہ للت نارائن راج بنشی نے 3 وکٹیں حاصل کیں۔
103 رنز کے ہدف کے تعاقب میں نیپال کا آغاز بھی اچھا نہ رہا اور کشال بھورتل دوسری ہی گیند پر بغیر کوئی رن بنائے آؤٹ ہوگئے، جبکہ آصف شیخ صرف 4 رنز بنا سکے۔
سندیپ جورا نے 35 گیندوں پر 34 رنز کی اہم اننگز کھیلی، جبکہ روہت کمار پاؤڈل نے 33 رنز بنا کر ٹیم کی فتح کی بنیاد رکھی۔ دیپیندر سنگھ ایری نے 15 رنز بنائے۔
نیپال نے ہدف 18ویں اوور میں 5 وکٹوں کے نقصان پر حاصل کرلیا، جبکہ گلشن کمار جھا نے آخری رن بنا کر ٹیم کو فتح دلا دی۔
یہ 2014 کے بعد ٹی20 کرکٹ میں افغانستان کے خلاف نیپال کی پہلی کامیابی ہے۔ اس فتح کے بعد نیپال کے ایشین گیمز کے کوارٹر فائنل میں رسائی کے امکانات بھی بہتر ہوگئے ہیں۔ ٹیم گروپ مرحلے کے اگلے میچ میں میزبان جاپان کا سامنا کرے گی۔
