بلوچستان کی پہلی ماس ٹرانزٹ سروس ’جناح پیپلز ٹرین‘ کوئٹہ پہنچ گئی ہے، جبکہ صوبائی حکومت نے اسے جلد عوام کے لیے چلانے کا اعلان کیا ہے۔
وزیراعلیٰ بلوچستان میر سرفراز بگٹی نے سوشل میڈیا پلیٹ فارم ’ایکس‘ پر منصوبے کی تفصیلات شیئر کرتے ہوئے بتایا کہ ٹرین کے لیے 32 کلومیٹر طویل ریلوے ٹریک کی اپ گریڈیشن مکمل کر لی گئی ہے۔
’جناح پیپلز ٹرین‘ کچلاک سے سریاب تک چلے گی اور اس کے روٹ پر مجموعی طور پر سات اسٹیشنز قائم کیے گئے ہیں۔ ٹرین کچلاک سے روانہ ہو کر بلیلی، شیخ ماندا، جی او آر، کوئٹہ اور لور کاریز سے ہوتی ہوئی سریاب پہنچے گی۔
وزیراعلیٰ کے مطابق اس منصوبے کا مقصد کوئٹہ اور گردونواح کے شہریوں کو سستی، محفوظ اور بہتر سفری سہولت فراہم کرنا ہے۔
وزیراعلیٰ بلوچستان کے آفیشل اکاؤنٹ سے جاری ویڈیو میں ’جناح پیپلز ٹرین‘ کے اندرونی اور بیرونی مناظر بھی دکھائے گئے ہیں، جن میں ٹرین کو جدید سہولیات سے لیس دیکھا جا سکتا ہے۔
