اسلام آباد: وزیر پیٹرولیم علی پرویز ملک نے کہا ہے کہ حکومت رواں ہفتے پیٹرول اور ڈیزل کی بین الاقوامی قیمتوں کے اشاریوں کا جائزہ لے کر آئندہ قیمتوں سے متعلق فیصلہ کرے گی۔
اپنے بیان میں وزیر پیٹرولیم نے کہا کہ حکومت نہ کسی ایک شعبے کو ترجیح دے رہی ہے اور نہ ہی کسی پر غیر ضروری بوجھ ڈال رہی ہے۔ ان کا کہنا تھا کہ حکومت اپنی بین الاقوامی ذمہ داریوں کو مدنظر رکھتے ہوئے صارفین تک ہر ممکن ریلیف پہنچانے کے لیے پُرعزم ہے۔
علی پرویز ملک نے مزید کہا کہ وزیراعظم کی قیادت میں اب تک ڈیزل کی قیمت میں مجموعی طور پر 200 روپے فی لیٹر جبکہ پیٹرول کی قیمت میں 155 روپے فی لیٹر کمی کی جا چکی ہے۔ انہوں نے کہا کہ عالمی منڈی میں قیمتوں کے رجحان کا جائزہ لینے کے بعد آئندہ قیمتوں کا تعین کیا جائے گا۔
