اسلام آباد ہائیکورٹ نے نئے ججز کی تعیناتی سے متعلق سمری کی منظوری نہ ہونے کے معاملے پر صدر مملکت اور وزیراعظم کو سیکریٹریز کے ذریعے کل کے لیے نوٹس جاری کرتے ہوئے جواب طلب کرلیا۔ عدالت نے وزارتِ قانون کو بھی نوٹس جاری کرکے سمری کی موجودہ صورتحال سے متعلق وضاحت طلب کی ہے۔
عدالت نے استفسار کیا کہ ججز کی تعیناتی کی سمری اس وقت کس مرحلے پر رکی ہوئی ہے اور منظوری میں تاخیر کی وجہ کیا ہے۔ درخواست گزار لقمان ظفر کی جانب سے زاہد آصف چودھری نے کیس کی پیروی کی۔
جسٹس ارباب محمد طاہر نے وفاقی حکومت کی جانب سے پیش رفت نہ ہونے پر برہمی کا اظہار کرتے ہوئے ایڈیشنل اٹارنی جنرل سے استفسار کیا کہ وفاقی حکومت کیا کر رہی ہے اور اس معاملے میں دلچسپی کیوں نہیں لے رہی۔ عدالت نے کہا کہ توقع تھی وفاقی حکومت اپنی ذمہ داری پوری کرے گی، تاہم ایسا نہیں ہوا۔
