کارکردگی پر بات کریں، جنس کی بنیاد پر نہیں، سابق کپتان کا ناقدین کو جواب
پاکستان ویمن کرکٹ ٹیم کی سابق کپتان ثناء میر نے قومی ویمن ٹیم کی کارکردگی پر صنفی بنیادوں پر ہونے والی تنقید پر سخت ردعمل دیا ہے۔
سوشل میڈیا پر جاری اپنے بیان میں ثناء میر نے کہا کہ کیا پاکستان کی مردوں کی ٹیم کبھی ورلڈ کپ نہیں ہاری؟ کیا ان کی کارکردگی میں اتار چڑھاؤ نہیں آیا؟ انہوں نے سوال اٹھایا کہ کیا کسی خاتون کرکٹر نے کبھی کسی مرد کرکٹر سے کہا کہ وہ کرکٹ چھوڑ کر تندور پر روٹیاں لگائے؟
سابق کپتان نے کہا کہ خواتین کرکٹرز کو صرف ان کی جنس کی بنیاد پر زیادہ تنقید کا سامنا کرنا پڑتا ہے۔ ان کے مطابق بعض افراد خواتین کھلاڑیوں کی مصنوعی ذہانت سے جعلی ویڈیوز بنا کر گمراہ کن معلومات بھی پھیلاتے ہیں۔
ثناء میر کا کہنا تھا کہ موجودہ معاشرتی سوچ باعثِ تشویش ہے، اور جب تک اس ذہنیت میں تبدیلی نہیں آئے گی، خواتین کھیلوں کی ترقی میں حقیقی پیش رفت ممکن نہیں ہوگی۔
