کراچی میں منشیات کیس میں گرفتار ملزمہ انمول عرف پنکی نے دورانِ تفتیش مبینہ طور پر اپنے وائس نوٹس کی تصدیق سے انکار کر دیا، جس کے بعد تفتیشی افسر نے عدالت سے ان کی آواز کا نمونہ حاصل کرنے کی اجازت طلب کر لی ہے۔
ذرائع کے مطابق تفتیش کے دوران ملزمہ سے منسوب متعدد وائس نوٹس سامنے آئے، تاہم انمول عرف پنکی نے ان وائس ریکارڈنگز کو اپنی آواز ماننے سے انکار کر دیا۔
تفتیشی افسر نے جوڈیشل مجسٹریٹ جنوبی کی عدالت میں درخواست دائر کرتے ہوئے مؤقف اختیار کیا کہ منشیات سے متعلق مقدمات کی تحقیقات میں وائس نوٹس اہم شواہد کی حیثیت رکھتے ہیں، اس لیے ملزمہ کی آواز کا نمونہ حاصل کر کے اس کا فارنزک تجزیہ کرانا ضروری ہے۔
درخواست میں کہا گیا ہے کہ جیل میں ملزمہ کی وائس سیمپل ریکارڈ کرنے کی اجازت دی جائے تاکہ اسے دستیاب وائس نوٹس سے ملا کر ان کی صداقت کا تعین کیا جا سکے۔
تفتیشی افسر کے مطابق فارنزک تجزیے سے یہ معلوم کرنے میں مدد ملے گی کہ تحقیقات میں شامل وائس نوٹس واقعی ملزمہ کی آواز پر مشتمل ہیں یا نہیں۔
