جِلد کے کینسر میں مبتلا آسٹریلوی کرکٹ ٹیم کے سابق کپتان مائیکل کلارک نے بیماری سے متعلق پیغام جاری کردیا
مائیکل کلارک نے سوشل میڈیا پر اپنے پیغام میں لکھا کہ اسکن کینسر خاص طور پر آسٹریلیا میں ایک حقیقت ہے، میرے ناک پر ایک اور کٹ پڑ گیا ہے، دوستانہ مشورہ ہے کہ اپنی جلد کا معائنہ کراتے رہیں۔ احتیاط علاج سے بہتر ہے۔
انہوں نے مزید لکھا کہ میرے کیس میں باقاعدگی سے چیک اپ اور جِلد سے متعلق تشخیض اہم ہے۔
یاد رہے کہ سابق کرکٹر کو چند برس قبل جلد کے کینسر کی علامات ظاہر ہوئی تھیں تاہم انہوں نے فوری طور پر اس کا انکشاف نہیں کیا تھا۔
مائیکل کلارک نے 2004 سے 2015 تک آسٹریلیا کی نمائندگی کرتے ہوئے 115 ٹیسٹ، 245 ون ڈے اور 34 ٹی ٹوئنٹی میچز کھیلے، وہ 74 ٹیسٹ اور 139 ون ڈے میچز میں کپتان رہے، ان کی قیادت میں آسٹریلیا نے 2013-14 میں ایشیز 0-5 سے جیتی اور 2015 کا ورلڈ کپ اپنے نام کیا۔
ماہرین کے مطابق اسکن کینسر بنیادی طور پر سورج کی الٹرا وائلٹ شعاعوں یا ٹیننگ بیڈز کی وجہ سے جلد کے خلیوں میں غیر معمولی تبدیلیوں سے ہوتا ہے، دنیا بھر میں یہ سب سے عام کینسر مانا جاتا ہے اور بروقت تشخیص اس کے علاج میں کلیدی کردار ادا کرتی ہے۔
