ممکنہ سیلاب سے نمٹنے کے لیے سندھ حکومت فوکل پرسن فلڈ اینڈ رین ایمرجنسی ،صوبائی وزیر ایکسائز اینڈ نارکوٹکس مکیش کمار چاولہ نے ٹوری بند کی صورتحال کا جائزہ لیا۔
صوبائی وزیر اور منتخب نمائندوں نے ممکنہ سیلاب سے نمٹنے کے لیے ٹوری اور کے کے بند کا دورہ کیا۔
اس موقع پر ایم پی اے میر غلام عابد خان سندرانی، ڈپٹی کمشنر کشمور آغا شیر زمان، ایس ایس پی کشمور محمد مراد اور صوبائی و وفاقی محکموں کے اعلیٰ افسران موجود تھے۔
ٹوری بند پر میڈیا سے گفتگو کرتے ہوئے صوبائی وزیر نے کہا کہ ممکنہ سیلاب سے نمٹنے کے لیے انتظامات مکمل کر لیے گئے ہیں۔ حفاظتی بندوں کے ساتھ میڈیکل اور ویٹرنری کیمپ قائم کیے گئے ہیں۔ دریائے سندھ میں پانی کی سطح اور حفاظتی ڈیموں کی نگرانی کی جا رہی ہے۔ پانی پنجند پہنچنے کے بعد ہی پتہ چلے گا کہ یہاں کتنا پانی آ رہا ہے۔ سندھ حکومت ممکنہ سیلاب کے لیے تیار ہے۔ سیلاب کی صورت حال میں سرکاری عمارتوں کے اندر امدادی کیمپ لگائے جائیں گے۔ سندھ حکومت کے انتظامات اونچے سیلاب کے لیے ہیں۔ پشتوں کی حالت اچھی ہے، اگر زیادہ پانی آجائے تو بھی آسانی سے گزر جائے گا۔ کچے کی آبادیوں کے متاثرین کے لیے حفاظتی پشتوں کے ساتھ میڈیکل اور ویٹرنری کیمپ لگائے جا رہے ہیں۔ پانی کی صورتحال پر نظر رکھی جا رہی ہے، کچے آبادیوں کے مکین احتیاطی تدابیر اختیار کریں۔ اگر پانی بڑھتا ہے تو کچے میں رہنے والے باشندوں کو کشتیوں کے ذریعے بچایا جائے گا۔ سکھر بیراج سے 8 سے 9 لاکھ کیوسک پانی آسانی سے گزرے گا۔ 2010 کے سیلاب کے بعد بند کی پشتوں کو 6 فٹ اونچا کیا گیا ہے۔
