لندن: شہزادی ڈیانا کی آج 65ویں سالگرہ منائی جا رہی ہے۔ اپنی پُرکشش شخصیت، دل موہ لینے والی مسکراہٹ اور فلاحی سرگرمیوں کے باعث وہ 1980 اور 1990 کی دہائی میں دنیا کی مقبول ترین شخصیات میں شمار ہوتی تھیں۔ وہ تین مرتبہ پاکستان کا دورہ بھی کر چکی تھیں اور یہاں ان کی آمد کو غیر معمولی پذیرائی حاصل ہوئی تھی۔
شہزادی ڈیانا 29 جولائی 1981 کو اُس وقت کے ولی عہد شہزادہ چارلس کے ساتھ رشتۂ ازدواج میں منسلک ہوئیں۔ ان کی شادی کو اُس وقت دنیا بھر میں غیر معمولی توجہ حاصل ہوئی، تاہم 1996 میں دونوں کی علیحدگی ہو گئی۔
ان کے دو بیٹے، شہزادہ ولیم اور شہزادہ ہیری ہیں۔ 31 اگست 1997 کو فرانس کے دارالحکومت پیرس میں ایک ٹریفک حادثے میں شہزادی ڈیانا انتقال کر گئیں، تاہم ان کی شخصیت اور انسانی خدمت کے لیے کی گئی کاوشیں آج بھی دنیا بھر میں محبت اور احترام کے ساتھ یاد کی جاتی ہیں۔
