کراچی : شہر قائد میں شدید بارشوں کے پیشِ نظر آج بروز بدھ 10 ستمبر کو کراچی کے تمام سرکاری اور پرائیویٹ اسکول بند رکھنے کا اعلان کر دیا گیا۔
آل سندھ پرائیویٹ اسکولز اینڈ کالجز ایسوسی ایشن نے آج تعطیل کا اعلان کردیا ہے، چیئرمین آل سندھ پرائیویٹ اسکولز حیدرعلی نے کہا ہے کہ کراچی میں آج بدھ کو نجی تعلیمی ادارے بند رہیں گے۔
ان کا کہنا ہے کہ بارشوں کے بعد سڑکوں پربہت زیادہ پانی کھڑا ہے، اسکول وینز بھی بچوں کو نہیں لاسکیں گی، واضح رہے کہ کراچی شہر میں منگل کی صبح سے ہلکی اور تیز بارشیں ہو رہی ہیں۔
قائم مقام کمشنر کراچی نے بھی شہر بھر کے تعلیمی اداروں کی آج چھٹی کا اعلان کردیا، کمشنر ہاؤس کی جانب سے نوٹیفیکیشن جاری کر دیا گیا ہے۔
نوٹیفکیشن میں کہا گیا ہے کہ کراچی میں شدید بارشوں کے پیش نظر تمام تعلیمی ادارے بند رکھنے کا فیصلہ کیا گیا لہٰذا آج شہر کے تمام تعلیمی ادارے بند رہیں گے۔
نوٹیفکیشن کے مطابق سرکاری و نجی تعلیمی ادارے ایک دن کیلئے بند کیے جائیں گے، تعلیمی اداروں کی تعطیل کا اطلاق پورے کراچی ڈویژن پر ہوگا۔
اس سے قبل قائم مقام کمشنر کراچی طارق چانڈیو کا کہنا تھا کہ اگر بارش کا کوئی اسپل آیا تو تعلیمی اداروں میں چھٹی کا فیصلہ کیا جائے گا، موسم کومد نظر رکھ کر اسکولوں کی چھٹی سے متعلق فیصلہ کیا جائے گا۔
