کراچی: سندھ اسمبلی کے بجٹ اجلاس کے دوران ایم کیو ایم کے رکن دانیال احمد نے پیپلز پارٹی کی حکومت پر شدید تنقید کرتے ہوئے کہا کہ 18 سال سے اقتدار میں ہونے کے باوجود کے فور منصوبہ تاحال مکمل نہیں کیا جا سکا۔
انہوں نے کہا کہ کراچی کو 15 ہزار بسوں کی ضرورت ہے جبکہ حکومت کی جانب سے صرف 2 ہزار بسیں فراہم کی گئی ہیں۔ ان کا کہنا تھا کہ سندھ میں شہنشاہیت کا نظام چل رہا ہے اور 6 کروڑ آبادی کے لیے صرف ایک ہزار اسکوٹیز دی گئی ہیں، جو ناکافی ہیں۔
دوسری جانب پیپلز پارٹی کے رکن قاسم سومرو نے ایوان میں جواب دیتے ہوئے کہا کہ سندھ حکومت سماجی تحفظ اور فلاحی منصوبوں پر توجہ دے رہی ہے۔ انہوں نے کہا کہ 2014 کے بعد تھر کول منصوبے کی بدولت ترقی کا نیا دور شروع ہوا ہے اور آج اس منصوبے سے ملک کو 3500 میگاواٹ بجلی فراہم کی جا رہی ہے۔
