اسلام آباد: وفاقی حکومت کی جانب سے آئندہ مالی سال کے بجٹ میں کراچی کے مختلف ترقیاتی منصوبوں کے لیے فنڈز مختص کر دیے گئے ہیں۔
بجٹ دستاویزات کے مطابق کراچی اربن انفرا اسٹرکچر ڈیولپمنٹ پیکج کے لیے 7 ارب 50 کروڑ روپے رکھے گئے ہیں، جبکہ گریٹر کراچی واٹر بلک سپلائی اسکیم کے لیے 10 ارب روپے مختص کیے گئے ہیں۔ کراچی کوسٹل پاور پراجیکٹ یونٹ ون اور ٹو کے لیے ایک کروڑ روپے مختص کیے گئے ہیں۔
دستاویزات کے مطابق گرین لائن بس منصوبے کے لیے ایک ارب 98 کروڑ روپے رکھے گئے ہیں، جبکہ شہر میں سڑکوں، گلیوں، نکاسی آب اور پانی کے مختلف منصوبوں پر بھی فنڈز خرچ کیے جائیں گے۔
مزید بتایا گیا ہے کہ ضلع غربی میں انفرا اسٹرکچر کی بحالی کے لیے 24 کروڑ 54 لاکھ روپے، ناظم آباد اور لیاقت آباد کے لیے 22 کروڑ روپے مختص کیے گئے ہیں۔ لانڈھی اور کورنگی میں سڑکوں، پانی، نکاسی آب اور پلے گراؤنڈز کے لیے 20 کروڑ روپے رکھے گئے ہیں۔
ضلع وسطی میں ترقیاتی کاموں کے لیے 4 کروڑ 50 لاکھ روپے جبکہ ضلع ملیر کے لیے 5 کروڑ روپے مختص کیے گئے ہیں۔
