لبنان کی مزاحمتی تنظیم حزب اللہ کے سربراہ نعیم قاسم نے اسرائیل کے ساتھ براہ راست مذاکرات کو سختی سے مسترد کرتے ہوئے اسے لبنان کے لیے نقصان دہ قرار دیا ہے۔ انہوں نے کہا کہ اسرائیل سے براہ راست بات چیت لبنان کو غیر مستحکم کر سکتی ہے، اس لیے ایسے مذاکرات کسی صورت قبول نہیں۔
نعیم قاسم نے کہا کہ مزاحمت بدستور مضبوط ہے اور اسے شکست نہیں دی جا سکتی۔ ان کے مطابق حکام کو براہ راست مذاکرات کے بجائے بالواسطہ مذاکرات کا راستہ اختیار کرنا چاہیے۔
انہوں نے مزید کہا کہ حزب اللہ اپنے ہتھیار نہیں ڈالے گی اور لبنان و عوام کے دفاع کے لیے مزاحمت جاری رکھے گی۔ ان کا کہنا تھا کہ دھمکیوں کے باوجود نہ پیچھے ہٹیں گے، نہ جھکیں گے اور نہ شکست قبول کریں گے۔
