جوہری جنگ کا خطرہ بڑھ گیا، اقوام متحدہ کا عالمی رہنماؤں کو انتباہ

اقوام متحدہ کے سیکرٹری جنرل انٹونیو گوٹریس نے خبردار کیا ہے کہ اس وقت دنیا میں جوہری ہتھیاروں کے استعمال کا خطرہ گزشتہ کئی دہائیوں کے مقابلے میں سب سے زیادہ ہو گیا ہے۔ اپنے بیان میں انہوں نے کہا کہ عالمی سطح پر بڑھتی ہوئی کشیدگی کے باعث دنیا میں امن کے خواب کو شدید خطرات لاحق ہیں۔ انٹونیو گوٹریس نے عالمی رہنماؤں پر زور دیا کہ وہ تنازعات میں کمی اور سفارتی حل تلاش کرنے کے لیے فوری اقدامات کریں۔ ان کا کہنا تھا کہ جدید ٹیکنالوجی اور ہتھیاروں کی ترقی جنگوں اور تنازعات کو مزید مہلک اور تباہ کن بنا رہی ہے، اس لیے عالمی برادری کو ذمہ داری کا مظاہرہ کرنا ہوگا۔