قومی ادارہ برائے امراضِ قلب (این آئی سی وی ڈی) کے اسٹیپ ڈاؤن یونٹ میں گزشتہ تین روز سے ائیر کنڈیشننگ نظام کی بندش کے باعث زیرِ علاج مریضوں کو شدید گرمی اور حبس کا سامنا ہے۔
ذرائع کے مطابق کیتھ لیب سے منتقل کیے جانے والے نازک مریض بھی اس صورتحال سے متاثر ہو رہے ہیں، جبکہ یونٹ میں درجہ حرارت بڑھنے کے باعث انہیں مختلف مشکلات پیش آ رہی ہیں۔ بتایا گیا ہے کہ اسٹیپ ڈاؤن یونٹ میں زیرِ علاج متعدد مریض شدید گرمی کے باعث بے چینی اور پریشانی کا شکار ہیں۔
گرمی کے اثرات کم کرنے کے لیے یونٹ میں پیڈسٹل فین نصب کیے گئے ہیں، تاہم ان کے استعمال سے وارڈ میں شور کی سطح میں اضافہ ہو گیا ہے۔ ذرائع کا مزید کہنا ہے کہ اے سی نظام کی مسلسل بندش کے باعث مریضوں میں سانس کی تکلیف اور دیگر طبی پیچیدگیوں کے خدشات بھی بڑھ گئے ہیں۔
واضح رہے کہ اسٹیپ ڈاؤن یونٹ میں ایسے مریضوں کو خصوصی نگرانی میں رکھا جاتا ہے جو کیتھ لیب سمیت مختلف طبی مراحل سے گزرنے کے بعد صحت یابی کے عمل میں ہوتے ہیں۔
دوسری جانب این آئی سی وی ڈی کے ترجمان نے مؤقف اختیار کیا ہے کہ یونٹ کے چلرز اچانک بند ہو گئے تھے، تاہم متبادل انتظام کے طور پر تین ائیر کنڈیشنڈ یونٹس کے ذریعے ماحول کو ٹھنڈا رکھنے کی کوشش کی جا رہی ہے۔ ترجمان کے مطابق چلرز کی مرمت کا کام جاری ہے اور توقع ہے کہ آئندہ دو سے تین روز میں نظام مکمل طور پر بحال ہو جائے گا۔
ترجمان نے مزید کہا کہ زیرِ علاج مریضوں کی حالت تسلی بخش ہے اور ادارہ صورتحال کی مسلسل نگرانی کر رہا ہے۔
