تہران: ایرانی وزارت خارجہ کے ترجمان اسماعیل بقائی نے امریکا پر جنگ بندی کی خلاف ورزیوں کا ذمہ دار قرار دیتے ہوئے کہا ہے کہ اسرائیل امریکی اجازت اور مکمل ہم آہنگی کے بغیر خطے میں کوئی کارروائی نہیں کر سکتا۔
تہران میں پریس کانفرنس کرتے ہوئے اسماعیل بقائی نے کہا کہ گزشتہ 24 گھنٹوں کے دوران پیش آنے والے تمام واقعات کی ذمہ داری امریکا پر عائد ہوتی ہے۔ ان کے بقول موجودہ جنگ بندی کی خلاف ورزیوں کو اسرائیل کی جانب سے ایک الگ اقدام قرار نہیں دیا جا سکتا کیونکہ اسرائیلی پالیسیوں اور اقدامات کے پیچھے امریکی حمایت اور منظوری موجود ہوتی ہے۔
ایرانی ترجمان نے کہا کہ کوئی بھی یہ بات تسلیم نہیں کر سکتا کہ اسرائیل امریکا کے ساتھ مکمل رابطے اور ہم آہنگی کے بغیر خطے میں کوئی بڑا قدم اٹھا سکتا ہے۔ انہوں نے الزام عائد کیا کہ حالیہ کشیدگی اور جنگ بندی کی خلاف ورزیاں دراصل امریکا کی جانب سے ترتیب دی گئی حکمت عملی کا حصہ ہیں۔
اسماعیل بقائی کا کہنا تھا کہ ایران جنگ بندی کے اصولوں کا پابند رہا ہے، تاہم دوسری جانب سے اس کی خلاف ورزی کی جا رہی ہے۔ انہوں نے واضح کیا کہ ایران اپنی قومی سلامتی اور مفادات کے دفاع کے لیے مکمل طور پر تیار ہے۔
انہوں نے مزید کہا کہ سفارت کاری اور دفاعی حکمت عملی ایک دوسرے کے ساتھ چل رہی ہیں اور ایران اپنے اعلیٰ ترین قومی مفادات کے تحفظ کو ہر صورت یقینی بنائے گا۔
