لاہور: لاہور ہائیکورٹ نے پاکستان تحریک انصاف (پی ٹی آئی) کی 5 اگست کو مینار پاکستان پر جلسہ کرنے کی اجازت سے متعلق درخواست مسترد کر دی۔
پی ٹی آئی رہنما میاں عثمان اکرم کی جانب سے دائر درخواست پر جسٹس مرزا وقاص رؤف نے سماعت کی۔ دوران سماعت سرکاری وکیل نے عدالت کو بتایا کہ مینار پاکستان پر جلسے کی اجازت سے متعلق درخواست مسترد کی جا چکی ہے۔
پی ٹی آئی کے وکیل نے عدالت سے استدعا کی کہ جلسے کے لیے متبادل جگہ فراہم کرنے کی اجازت دی جائے۔ عدالت نے سرکاری وکیل کو ہدایت کی کہ ڈپٹی کمشنر سے اس حوالے سے فوری معلومات لے کر عدالت کو آگاہ کیا جائے کہ آیا مینار پاکستان کے علاوہ کسی اور مقام پر جلسے کی اجازت دی جا سکتی ہے یا نہیں۔
بعد ازاں عدالت نے قرار دیا کہ جلسے سے متعلق درخواست پر ڈپٹی کمشنر فیصلہ کر چکے ہیں، لہٰذا درخواست غیر ضروری ہے، اور اسے مسترد کر دیا گیا۔
