جے پور: بھارتی شہر جے پور میں تعلیمی پرچوں کے لیک ہونے، تعلیمی نظام کی خرابیوں اور بے روزگاری کے خلاف احتجاج کے دوران کاکروچ جنتا پارٹی کے بانی ابھجیت دیپکے پر نامعلوم افراد نے حملہ کر دیا۔
بھارتی میڈیا پر وائرل ہونے والی ویڈیو کے مطابق احتجاج کے دوران ایک شخص نے ابھجیت دیپکے کو گلے میں ڈالے گئے صافے سے کھینچا، جس کے بعد دو افراد نے انہیں بار بار تھپڑ اور مکے مارے۔
واقعے کے بعد دیپکے کے حامیوں نے مبینہ حملہ آوروں کو پکڑ کر ان پر تشدد کیا۔ بعد ازاں صورتحال کشیدہ ہو گئی۔
ابھجیت دیپکے نے واقعے کے بعد سوشل میڈیا پر ردِعمل دیتے ہوئے کہا کہ ایسے حملے ان کی تحریک کو نہیں روک سکتے اور وہ پرامن احتجاج جاری رکھیں گے۔ انہوں نے بھارت کے وزیرِ تعلیم دھرمیندر پردھان کے استعفے کا مطالبہ بھی دہرایا۔
پولیس کے مطابق واقعے میں ملوث 6 افراد کو حراست میں لے کر تفتیش شروع کر دی گئی ہے۔
