اردن میں مختلف شعبہ ہائے زندگی سے تعلق رکھنے والے سیکڑوں افراد نے حکومت سے امریکی فوج کی موجودگی ختم کرنے کا مطالبہ کرتے ہوئے ایک کھلے خط پر دستخط کیے ہیں۔ امریکی اخبار کے مطابق خط میں مؤقف اختیار کیا گیا ہے کہ امریکی فوج کی موجودگی اردن کی خودمختاری، سلامتی اور قومی مفادات کے لیے خطرہ بن رہی ہے۔
دستخط کنندگان کا کہنا ہے کہ غیر ملکی افواج کی موجودگی ملک کو سکیورٹی، سیاسی اور معاشی چیلنجز سے دوچار کر سکتی ہے۔ دوسری جانب اردنی حکومت کے ترجمان نے اس خط میں لگائے گئے الزامات پر فوری طور پر کوئی ردعمل نہیں دیا۔
رپورٹ کے مطابق پیر کو اردنی پارلیمنٹ کے اجلاس میں امریکی فوجیوں کی ہلاکت پر تعزیت کی تجویز پیش کیے جانے پر ایوان میں شدید احتجاج دیکھنے میں آیا، جبکہ بعض ارکان نے امریکی فوج پر شہریوں کی ہلاکتوں کے الزامات بھی عائد کیے۔ ماہرین کے مطابق اردن میں عوامی رائے کے باقاعدہ سروے نہ ہونے کے باعث یہ کہنا مشکل ہے کہ یہ خط عوامی رائے کی کتنی نمائندگی کرتا ہے۔
