مظفرآباد: آزاد کشمیر قانون ساز اسمبلی کے انتخابات کے پہلے مرحلے میں آنے والے غیرحتمی اور غیرسرکاری نتائج کے مطابق مسلم لیگ (ن) نے واضح برتری حاصل کرلی ہے، جبکہ پاکستان پیپلز پارٹی دوسرے نمبر پر ہے۔
میرپور، کوٹلی اور بھمبر ڈویژن کے 13 حلقوں میں پیر کو پولنگ کا عمل مکمل ہوا۔ شام 5 بجے مقررہ وقت پر پولنگ ختم ہونے کے بعد ووٹرز کی سہولت کے لیے ایک گھنٹے کی اضافی مہلت دی گئی، جس کے بعد ووٹوں کی گنتی اور نتائج موصول ہونے کا سلسلہ جاری ہے۔
اب تک 13 میں سے 11 حلقوں کے مکمل غیرحتمی اور غیرسرکاری نتائج سامنے آچکے ہیں۔ ان نتائج کے مطابق مسلم لیگ (ن) نے 8 نشستوں پر کامیابی حاصل کی ہے، جبکہ پاکستان پیپلز پارٹی 3 نشستیں جیتنے میں کامیاب رہی ہے۔
غیرحتمی نتائج کے مطابق مسلم لیگ (ن) نے ایل اے-1 میرپور 1، ایل اے-4 میرپور 4، ایل اے-5 بھمبر، ایل اے-7 بھمبر 3، ایل اے-9 کوٹلی 2، ایل اے-11 کوٹلی 4، ایل اے-12 کوٹلی 5 اور ایل اے-13 کوٹلی 6 میں کامیابی حاصل کی۔
دوسری جانب پاکستان پیپلز پارٹی نے ایل اے-2 میرپور 2، ایل اے-3 میرپور 3 اور ایل اے-8 کوٹلی 1 میں کامیابی حاصل کی ہے۔
انتخابی نتائج کا سلسلہ تاحال جاری ہے اور باقی حلقوں کے غیرحتمی نتائج کا انتظار کیا جا رہا ہے۔
