غزہ میں اسرائیلی حملوں سے متاثرہ خستہ حال عمارت منہدم ہونے کے نتیجے میں بچوں سمیت 20 فلسطینی جاں بحق ہوگئے۔ عرب میڈیا کے مطابق عمارت میں بے گھر فلسطینیوں کے کئی خاندان رہائش پذیر تھے، جو اسرائیلی حملوں کے دوران شدید نقصان کا شکار ہوچکی تھی۔
رپورٹس کے مطابق عمارت کے ملبے تلے کم از کم 100 فلسطینیوں کے دبے ہونے کی اطلاعات ہیں، جبکہ ریسکیو ٹیمیں متاثرین کو نکالنے کے لیے کارروائیاں جاری رکھے ہوئے ہیں۔ اب تک 12 افراد کو زندہ نکال لیا گیا ہے۔ غزہ سول ڈیفنس کے مطابق مسلسل بمباری اور ناکہ بندی کے باعث غزہ میں ہزاروں کمزور اور نیم تباہ شدہ عمارتیں رہائش کے لیے انتہائی خطرناک ہوچکی ہیں۔
