بیجنگ: چین نے تائیوان کے معاملے پر واضح تنبیہ کرتے ہوئے کہا ہے کہ جو بھی اس حوالے سے مقررہ حد سے تجاوز کرے گا، اسے سنگین نتائج کا سامنا کرنا پڑے گا۔
غیر ملکی میڈیا کے مطابق چینی وزارتِ خارجہ کے ترجمان گو جیا کھون نے پریس کانفرنس کے دوران کہا کہ چین ان ممالک کی جانب سے تائیوان انتظامیہ کے ساتھ کسی بھی قسم کے سرکاری تبادلے یا روابط کی سخت مخالفت کرتا ہے، جن کے بیجنگ کے ساتھ سفارتی تعلقات قائم ہیں۔
رپورٹس کے مطابق حال ہی میں پاناما کی کانگریس کے بعض ارکان نے نام نہاد “پاناما-تائیوان قانون ساز اداروں کا کراس پارٹی ایکسچینج گروپ” قائم کیا ہے۔
اس معاملے پر پاناما کے صدر نے واضح کیا کہ ملک کی خارجہ پالیسی حکومت طے کرتی ہے، جبکہ حکومت تائیوان کے ساتھ پاناما کی پارلیمنٹ کے ارکان کے روابط کی حمایت نہیں کرتی۔
چینی وزارتِ خارجہ کے ترجمان نے کہا کہ چین نے پاناما حکومت کے ان بیانات کا نوٹس لیا ہے اور امید ہے کہ پاناما ایک چین کے اصول کو عملی جامہ پہناتے ہوئے چین اور پاناما کے تعلقات کی سیاسی بنیادوں کا تحفظ کرے گا۔
ترجمان نے خبردار کیا کہ تائیوان کے معاملے پر کوئی بھی فریق اپنی حد سے تجاوز کرے گا تو اسے لامحالہ سنگین نتائج کا سامنا کرنا پڑے گا۔
