کراچی: ڈیری اینڈ کیٹل فارمرز ایسوسی ایشن نے کمشنر کراچی کو خط ارسال کرتے ہوئے دودھ کی فی لیٹر قیمت میں 100 روپے اضافے کا مطالبہ کیا ہے۔
ایسوسی ایشن نے درخواست کی ہے کہ دودھ کی نئی سرکاری قیمت 340 روپے فی لیٹر مقرر کی جائے، کیونکہ پیٹرول، ڈیزل اور بجلی کی قیمتوں میں مسلسل اضافے سے دودھ کی پیداواری لاگت میں نمایاں اضافہ ہو چکا ہے۔
ڈیری اینڈ کیٹل فارمرز ایسوسی ایشن کے صدر مبشر قدیر عباسی نے اپنے خط میں مؤقف اختیار کیا کہ موجودہ نرخوں پر دودھ کی فروخت فارمرز کے لیے ممکن نہیں رہی، جس کے باعث انہیں شدید مالی مشکلات کا سامنا ہے۔
انہوں نے کمشنر کراچی سے اپیل کی کہ اس صورتحال کا فوری نوٹس لیتے ہوئے آئندہ 48 گھنٹوں میں ہنگامی اجلاس طلب کیا جائے اور ڈیری فارمرز کو معاشی نقصان سے بچانے کے لیے مؤثر فیصلے کیے جائیں۔
مبشر قدیر عباسی نے خبردار کیا کہ اگر فارمرز کو ان کی حقیقی پیداواری لاگت کے مطابق قیمت نہ ملی تو ڈیری سیکٹر کو مزید سنگین معاشی بحران کا سامنا کرنا پڑ سکتا ہے۔
