ملتان: ملتان میں غربت اور بے بسی کی ایک دل دہلا دینے والی تصویر اس وقت سامنے آئی جب ایک غریب باپ کفن خریدنے کے پیسے نہ ہونے کے باعث اپنے جوان بیٹے کی میت صرف ایک چادر میں لپیٹ کر رشید آباد قبرستان تدفین کے لیے پہنچ گیا۔ باپ نے بتایا کہ شدید مالی تنگی کے باعث وہ کفن اور تدفین کے اخراجات برداشت کرنے سے قاصر تھا۔
اطلاع ملنے پر لوہاری گیٹ پولیس موقع پر پہنچی، جہاں پولیس اہلکاروں نے انسانی ہمدردی کا مظاہرہ کرتے ہوئے اپنی جیب سے رقم جمع کی، کفن کا انتظام کیا اور نوجوان کی تدفین میں بھی مدد فراہم کی۔ اس واقعے نے معاشرے میں غربت اور ضرورت مند خاندانوں کی مشکلات کو ایک بار پھر نمایاں کر دیا۔
