عالمی توانائی منڈی میں خام تیل کی قیمتوں میں مسلسل کمی کا رجحان دیکھا جا رہا ہے، جس کی بڑی وجہ ایران اور امریکا کے درمیان ممکنہ معاہدے اور آبنائے ہرمز کے دوبارہ کھلنے کی بڑھتی ہوئی توقعات قرار دی جا رہی ہیں۔
بین الاقوامی مارکیٹ میں خام تیل کی قیمت میں مزید 5 فیصد کمی ریکارڈ کی گئی ہے، جس کے بعد امریکی کروڈ آئل 76 ڈالر جبکہ برطانوی برینٹ خام تیل 79 ڈالر فی بیرل پر ٹریڈ کر رہا ہے۔
معاشی ماہرین کے مطابق عالمی منڈی میں تیل کی قیمتوں میں کمی کے اثرات پاکستان میں بھی پٹرولیم مصنوعات کی قیمتوں پر مرتب ہو سکتے ہیں، جس سے آئندہ قیمتوں میں کمی کا امکان پیدا ہو گیا ہے۔
رپورٹس کے مطابق ایران اور امریکا کے درمیان مجوزہ معاہدے کے تحت ایران کو عالمی منڈی میں تیل فروخت کرنے کی اجازت مل سکتی ہے۔ وال اسٹریٹ جرنل کی رپورٹ کے مطابق اس پیش رفت نے عالمی مارکیٹ میں سپلائی بڑھنے کی توقعات کو تقویت دی ہے، جس کے باعث تیل کی قیمتوں میں کمی کا رجحان مزید مضبوط ہوا ہے۔
واضح رہے کہ ایران سے متعلق کشیدگی اور جنگی خدشات سے قبل عالمی منڈی میں خام تیل کی قیمت تقریباً 73 ڈالر فی بیرل تھی، جبکہ تنازع کے دوران قیمتیں بڑھ کر 126 ڈالر فی بیرل سے بھی تجاوز کر گئی تھیں۔
ماہرین کا کہنا ہے کہ اگر ایران امریکا معاہدہ طے پا جاتا ہے اور آبنائے ہرمز معمول کے مطابق فعال رہتی ہے تو عالمی توانائی منڈی میں مزید استحکام اور قیمتوں میں کمی دیکھی جا سکتی ہے۔
