دوحہ: قطر کی وزارت داخلہ نے ریزیڈنسی پرمٹ منسوخ ہونے کے بعد ملک میں قیام کی رعایتی مدت میں اہم تبدیلی کرتے ہوئے اسے 30 دن سے کم کر کے 14 دن کر دیا ہے۔
وزارت داخلہ کے پبلک ریلیشنز ڈیپارٹمنٹ کی جانب سے محفوظ سفری طریقہ کار کے حوالے سے منعقدہ ایک ویبینار کے دوران ایئرپورٹ پاسپورٹس ڈیپارٹمنٹ کے کیپٹن علی احمد علی الکواری نے نئی پالیسی سے آگاہ کیا۔
انہوں نے بتایا کہ اب اگر کسی غیر ملکی رہائشی کا اقامتی اجازت نامہ (ریزیڈنسی پرمٹ) منسوخ ہو جاتا ہے تو اسے 14 دن کے اندر قطر چھوڑنا ہوگا، بصورت دیگر اسے جرمانے کا سامنا کرنا پڑے گا۔
کیپٹن علی الکواری کے مطابق پہلے یہ رعایتی مدت 30 دن تھی، تاہم نئی ہدایات کے تحت اسے کم کر کے دو ہفتے کر دیا گیا ہے۔ مقررہ مدت سے زائد قیام کرنے والوں پر روزانہ 10 قطری ریال جرمانہ عائد کیا جائے گا۔
انہوں نے شہریوں اور غیر ملکی رہائشیوں کو مشورہ دیا کہ سفر سے قبل متراس موبائل ایپ کے ذریعے اپنی سفری اور قانونی حیثیت ضرور چیک کریں۔ اس ایپ کے ذریعے ٹریفک جرمانوں، اوور اسٹے چارجز اور دیگر واجبات سے متعلق معلومات بھی حاصل کی جا سکتی ہیں۔
قطری حکام کا کہنا ہے کہ اس اقدام کا مقصد امیگریشن قوانین پر مؤثر عمل درآمد اور سفری امور کو مزید منظم بنانا ہے۔
