بھارتی ٹی وی اداکارہ سنچیتا اوگلے کی موت کے معاملے میں نیا موڑ سامنے آیا ہے، جہاں ان کے والد نے دعویٰ کیا ہے کہ ان کی بیٹی مسلسل ہراسانی اور شدید ذہنی دباؤ کا شکار تھی۔
بھارتی میڈیا رپورٹس کے مطابق مشہور ڈرامے “کمکم بھاگیہ” میں اداکاری کرنے والی 22 سالہ سنچیتا اوگلے نے 14 جون کو اپنی رہائش گاہ پر خودکشی کر لی تھی۔ ابتدائی پولیس تحقیقات میں جائے وقوعہ سے کوئی خودکشی نوٹ یا مشکوک شواہد برآمد نہیں ہوئے تھے۔
تاہم اب اداکارہ کے والد مچھندرا اوگلے نے ایک انٹرویو میں انکشاف کیا ہے کہ سنچیتا اکثر پریشان رہتی تھی، لیکن اس نے کبھی اپنی پریشانی کی اصل وجہ گھر والوں کو نہیں بتائی۔ ان کے مطابق بعض اوقات وہ خوش دکھائی دیتی تھی لیکن اچانک شدید افسردگی کا شکار ہو جاتی تھی۔
انہوں نے بتایا کہ اہل خانہ کو اندازہ تھا کہ سنچیتا ذہنی دباؤ میں ہے، اسی لیے وہ اس کے ساتھ رہنے کی کوشش کرتے تھے، تاہم واقعے سے قبل تقریباً آدھے گھنٹے کے لیے وہ اکیلی تھی، جس دوران اس نے یہ انتہائی قدم اٹھایا۔
سنچیتا کے والد نے الزام عائد کیا کہ کوئی شخص یا افراد اسے مسلسل ہراساں کر رہے تھے اور ممکنہ طور پر مالی یا دیگر معاملات پر دباؤ ڈال رہے تھے۔ ان کا کہنا تھا کہ ان کی بیٹی کو مسلسل ذہنی اذیت اور دباؤ کا سامنا تھا۔
پولیس کی جانب سے واقعے کی تحقیقات جاری ہیں، جبکہ اداکارہ کے والد کے الزامات کے بعد معاملے کے مختلف پہلوؤں کا دوبارہ جائزہ لیا جا رہا ہے۔
