مقبوضہ مغربی کنارے کے جنوبی علاقے تل رومیدا میں اسرائیلی فوج کی فائرنگ کے نتیجے میں 7 ماہ کا فلسطینی بچہ جاں بحق جبکہ اس کے والدین زخمی ہو گئے۔
میڈیا رپورٹس کے مطابق فلسطینی وزارت صحت نے تصدیق کی ہے کہ جاں بحق ہونے والے بچے کی شناخت سام ابو ہیکل کے نام سے ہوئی ہے۔ واقعے میں بچے کے والد فہد عبدالعزیز ابو ہیکل اور والدہ بھی زخمی ہوئے۔ فہد عبدالعزیز بیت اللحم یونیورسٹی میں لیکچرر کے فرائض انجام دے رہے ہیں اور اپنے اہل خانہ کے ساتھ بیت لحم میں مقیم تھے۔
رپورٹس کے مطابق یہ واقعہ اس وقت پیش آیا جب فہد عبدالعزیز اپنی اہلیہ اور شیر خوار بیٹے کے ہمراہ وسطی ہیبرون کے علاقے تل رومیدا میں اپنی والدہ کے گھر جا رہے تھے۔ اسی دوران اسرائیلی فوجیوں کی جانب سے ان کی گاڑی پر فائرنگ کی گئی۔
فائرنگ کے نتیجے میں فہد عبدالعزیز کے ہاتھ میں گولی لگی جبکہ ان کی اہلیہ بھی زخمی ہوئیں۔ اطلاعات کے مطابق ایک گولی 7 ماہ کے سام ابو ہیکل کے جبڑے میں لگی، جس کے باعث وہ جانبر نہ ہو سکا۔
