اسلام آباد : قومی اسمبلی کی قائمہ کمیٹی کے اجلاس کے دوران گورنر اسٹیٹ بینک نے ملک کی معاشی صورتحال پر بریفنگ دیتے ہوئے کہا ہے کہ پاکستان کے زرمبادلہ ذخائر مسلسل بہتر ہو رہے ہیں اور ہر ہفتے ان میں اضافہ ریکارڈ کیا جا رہا ہے۔ انہوں نے بتایا کہ گزشتہ ماہ 5 ارب ڈالر کی بیرونی ادائیگیوں کے باوجود ذخائر مستحکم رہے جبکہ رواں ماہ زرمبادلہ ذخائر 17 ارب ڈالر سے تجاوز کر جائیں گے۔
گورنر اسٹیٹ بینک کے مطابق پاکستان کا بیرونی قرضہ 100 ارب ڈالر پر برقرار ہے اور مالیاتی صورتحال میں بتدریج بہتری آ رہی ہے۔ انہوں نے کہا کہ آئی ایم ایف کی جانب سے متوقع فنڈز موصول ہونے کے بعد زرمبادلہ ذخائر تین ماہ کی درآمدات کے مساوی ہو جائیں گے، جس سے ملکی معیشت کو مزید استحکام ملنے کی توقع ہے۔
